ការចាក់បញ្ចូលមេជីវិតទៅក្នុងស្បូន ឬIntrauterine insemination (IUI) គឺជាការចាក់បញ្ចូលមេជីវិតឈ្មោលដែលបានធ្វើការលាងសម្អាតរួចរាល់ទៅក្នុងស្បូនរបស់ស្ត្រីនៅថ្ងៃដែលធ្លាក់ពងញីតាមការកំណត់របស់គ្រូពេទ្យ។ ជាមួយនឹងការធ្វើIUIមេជីវិតឈ្មោលមានចម្ងាយជិតជាងក្នុងការធ្វើដំណើរទៅដល់ពងញីជាងការរួមភេទ។
តើត្រូវធ្វើអ្វីខ្លះមុនពេលចាក់បញ្ចូលមេជីវិតឈ្មោលទៅក្នុងស្បូន?
មុនពេលមានការចាក់បញ្ចូលមេជីវិតឈ្មោលទៅក្នុងស្បូនបាន គ្រូពេទ្យជំនាញនិងតម្រូវឲ្យមានការពិនិត្យសុខភាពចំពោះគូស្វាមី ភរិយាដែលមានបំណងក្នុងការធ្វើIUIជាមុនសិន។
ជាទូទៅស្ត្រីនឹងត្រូវពិនិត្យទៅលើអ័រមូន សុខភាពស្បូន និងការបញ្ចេញពងញី
- អ័រមូនរបស់ស្ត្រីដើរតួនាទីសំខាន់ក្នុងការបម្រែបម្រួលនៃសុខភាពទាំងមូល
- សុខភាពស្បូនក៏ជាកត្តាដែលបណ្ដាលឲ្យស្ត្រីពិបាកក្នុងការមានកូនដែរ ដូច្នេះហើយវេជ្ជបណ្ឌិតនិងធ្វើការពិនិត្យស្បូនតាមរយៈអេកូសាស្ត្រដើម្បីស្វែងរកថាតើស្បូនរបស់ស្ត្រីមានទម្រង់យ៉ាងដូចម្ដេចដែរ (ស្បូនមានការបត់ទៅខាងមុខ រឺខាងក្រោយ) មានទំហំប៉ុណ្ណា ដៃស្បូនទាំងសងខាងមានបញ្ហាដែរឬទេ តើមានចំនួនពងញីប៉ុន្មានគ្រាប់។
- វេជ្ជបណ្ឌិតនិងធ្វើការពិនិត្យពងញីរបស់ស្ត្រីថាតើ ពងញីនោះមានទំហំប៉ុណ្ណា ទុំដែរឬទេ ?
មួយចំណុចទៀតសម្រាប់ស្ត្រីត្រូវតែដឹងនោះគឺជំងឺរលាកមាត់ស្បូន ការរលាកមាត់ស្បូននេះគឺបណ្ដាលមកពីការឆ្លងមេរោគតាមរយៈការរួមភេទ ដែលនាំឲ្យមាត់ស្បូនស្អិតមិនអាចបង្ករកំណើតបាន ហើយការស្អិតដែលមិនអាចបង្ករកំណើតនេះ ក៏អាចជាដោយខ្លួនឯងដែរ ប៉ុន្តែបន្ទាប់ពីជាដោយខ្លួនឯងមេរោគនោះអាចឆ្លងឡើងទៅដល់ដៃស្បូនដោយស្ត្រីមិនបានដឹង ហើយនៅពេលដែលស្ត្រីមានកូនអាចបង្ករឲ្យទៅជាកូននៅក្រៅស្បូន។ទាំងនេះហើយជាបញ្ហាដែលស្ត្រីគួរតែសំរេចចិត្តពិនិត្យសុខភាពមុនពេលធ្វើការយកកូន។
ចំពោះបុរសត្រូវពិនិត្យសុខភាពដើម្បីរកមើលមេរោគឆ្លងតាមរយៈការពិនិត្យឈាមនិងមេជីវិត
- ការពិនិត្យឈាមចំពោះបុរសគឺដើម្បីរកមើលថាមានមេរោគឆ្លងនៅក្នុងឈាមដែរឬទេ
- ការពិនិត្យមេជីវិតគឺត្រូវមើលទៅលើចំនួន រូបរាង និងចលនារបស់មេជីវិតឈ្មោល
តើពេលណាដែលគួរទៅស្វែងរកការព្យាបាលដោយIUI?
- ស្ត្រីដែលមានអាយុតិចជាង35ឆ្នាំរស់នៅជាមួយស្វាមីរបស់គាត់រយៈពេល1ឆ្នាំហើយនៅតែមិនមានផ្ទៃពោះដោយគ្មានការ ការពារអ្វីទាំងអស់ នោះយើងចាត់ទុកគាត់ថាជាស្ត្រីដែលលំបាកក្នុងការមានកូន។
- ស្ត្រីដែលមានអាយុលើសពី35ឆ្នាំ ហើយរស់នៅជាមួយស្វាមីរបស់គាត់រយៈពេល6ខែដោយគ្មានការ ការពារអ្វីទាំងអស់ នោះយើងចាត់ទុកគាត់ថាជាស្ត្រីដែលលំបាកក្នុងការមានកូន ដែលទាមទារអោយគាត់មកធ្វើការពិនិត្យសុខភាពដើម្បីទទួលបានការព្យាបាលអោយបានត្រឹមត្រូវ។
IUIមិនត្រូវបានណែនាំសម្រាប់អ្នកជំងឺដូចខាងក្រោម៖
- ស្ត្រីដែលមានជំងឺដៃស្បូនធ្ងន់ធ្ងរ
- ស្ត្រីដែលមានប្រវត្តិឆ្លងមេរោគក្នុងអាងត្រគាក
- ស្ត្រីដែលមានជំងឺដុំសាច់(Endometriosis) កម្រិតមធ្យមទៅធ្ងន់ធ្ងរ
អត្រាជោគជ័យនៃការធ្វើIUI
អត្រាជោគជ័យនៃការចាក់បញ្ចូលមេជីវិតទៅក្នុងស្បូន(IUI)គឺមានទាបជាង20%ដែលស្ថិតក្នុងលក្ខខណ្ឌមេជីវិតឈ្មោលនិងដៃស្បូនស្ត្រីមានសុខភាពល្អ។
***ចំពោះស្ត្រីដែលមានអាយុលើសពី35ឆ្នាំគ្រូពេទ្យមិនធ្វើការណែនាំអោយប្រើប្រាស់សេវាកម្មចាក់បញ្ចូលមេជីវិតឈ្មោលនោះទេ។ឬករណីបុរសមានចំនួនមេជីវិតតិចជាង១០លានក្នុងមួយមីលីលីត្រ។